Pascas e Pascadas

Una pascada es totjorn mai espessa qu'un pescajon.

Profecham de la temporada pascala, fèsta crestiana pegada fa de temps sus una anteriora data pagana, per parlar cosina.

Un còp èra, en Occitània, i aviá la tradicion de la Pascada. Plan nomada puèi qu' aquesta recèpta de cosina occitana se preparava mai que mai per ola fèsta pascala (mes d'abrial). A la debuta aquesta preparacion es sortida de Roergue mas es coneguda ara de totes los golards que son al fial. Los ingredients son tan simples e de bon trobar que pauc nombroses : dos o tres uòus del jorn, 50 cl de farina de cereala e 25 cl empr'aquí de lach, una o doas cebas. La bastison se debana en tres fasas : 

1. Dins una padena, fasètz revener las cebas segon la vòstra convenéncia de coseson (ieu, aimi l'amarum de las cebas un pauquet rabastinadas).
2. Dins un cuol de pola (tèrmi sabent de cosina ; un ensaladièr del fons redond, pels neofits), mesclatz amb una forqueta o un foet lo lach amb los uòus en primièr puèi ajustatz la farina pichon pichon. Salatz a vòstre gost.
3. Per acabar, vojatz lo contengut dins la padena e fasètz coire dapasset de fuòc pichòt.

La darrièra manòbra serà de revirar la pascada dins la padena coma un pescajon (atencion al denaut).

Vesètz qu'es una recèpta lèu facha, economica e bona qu'es pas de creire. Personalament i apondi de còps tròces de carnsalada coma de lardons o quora se trapa de boçins de fromatge de Rocafòrt o maitas composicions de mon prètzfach. I ajusti percòps de verdum coma de fuèlhas de bletas per exemple. M'arribi de m'alestir lo repais de miègjorn de l'endeman en far un entrepan amb una pascada. Balha de vam a un onèsta òme (femna o enfant atanben) per lo demai de la jornada. Evidentament es pas de comparar amb lo daquòs merdic-industrial e nociu per la santat que se pòt crompar a prètz d'aur dins los grands M o los grands Q e ont es grand aquí dedins pas que lo mesprètz de la practica e de sa santat.

Sus aquò, topinejatz plan en saber que cal pas mai, un còp afièch, d'un quart d'ora per s'aprestar lo plat de l'occitan dinamic !

soulcraft

ps : agacha defòra e tanben dins lo frigò!        

Tolosa, 31 de mars de 2012.

L'Occitan lèu dins lo jòc ?

Dissabte 31 de Mars de 2012 a Tolosa se trobèrem mai de trenta milas. Èra, d'ara enlà, la costumièra passa-carrièira dels militants de la lenga e cultura occitana que se ramosan per far melhor ausir lor votz. Estrategicament lo moment pareissiá plan causit abans lo vòte per l'eleccion presidenciala d'abrial e en seguida las legislativas de junh. L'ambient èra plan bon, convivent e festiu coma se pòt esperar d'un pòble de civilizacion mediterranèa que son los Occitans. Lo public variat amb de joves, los ancians, los pichons de Calandreta e de Òc-bi, lo còs de mèstres de la Felco e maitas associacions o gropaments amb totes l'intéres comun per la lenga. L'ensenhament e la musica èran fòrça representats dins lo cortègi que son los vectors coneguts de promocion de l'òc.

 Caquelà nos sembla interessant de puntejar un fenomèn que pren d'ample a dich que los problèmas materials, mai que mai finançièrs, de l'accion culturala venon prusents dins lo contèxt de crisi permanenta que vivèm a l'ora d'ara. De fach, se podiá ausir parlar de politica dins lo cors de la passejada. Sabèm qu'existís ja dos o tres partits politics occitans que se baton per se far ausir si que non escotar dins lo mitan politic francés fòrça fòrça centralizat e que i se pòt pas pensar de vida fòra la luènha Paris. Mas, demest d'aqueles, un partit capita de plaçar d'elegits, siá d'esperel siá aligat amb un partit ecologic francés. Benlèu lo moviment prendriá vam se i aviá mai d'actors, mas onte trobar de personas que volontan de concretizar lor militança occitana dins l'accion politica ?

La responsa seriá de convéncer d'unes "culturals" de prene partit, al sens primièr, dins l'arena politica. Or sabèm qu'es pas simpla de passar lo Rubicon dins la posicion actuala de l'engajament cultural occitan. Sovent l'implicacion financièra de las collectivitats en favor de la lenga se fa amb l'accòrd implicit de neutralitat politica de l'associacion culturala. Es un argument emplegat per las quitas estructuras associativas que se vòlon amassairas a un nivèl que trespassa los clivatges politics tradicionals. Es atal que trapam dels responsables locals de cada ban de l'escaquièr. Se volèm durar, cal manhagar cabra e caulet.

Far de politica en son quite nom d'occitan es se pausar en concurrents dirèctes de los que, ièr, nos avidèrem. Al risc de tot mandar a la fièira en cas de fracàs ...

Passar de l'accion culturala a l'accion politica es encara un tabó mas i a que las montanhas que se crosan pas, alara...

soulcraft

Ps : agacha defóra, e endacòm mai.

Una vida de mèrda

Audoard Limonov 2011

Atal s'exprimís Audoard Limonov quand parla de sa vida. Vertat es qu'es un bolegaire de primièira. Nascut en febrièr de 1943 a Dzerjinsk costat Novgorod en Russia,rebala amb de sacamands per un moment e, quora son empresonats, frequenta la librariá 41 e entemena la lectura de libres enebits d'aquel temps en Russia. Publica de poèmas a Moscòu mas es "convidat" a quitar lo país. En 1974 arriba New-York ont escriu romans e ecriches autobiografics tot en passar de vagabond a vailet de cambra d'un miliardeire. Caquelà aterrís a Paris en 1982 e dintra dins de cercles literaris, trabalha a de jornals e sustot a l'idiot international ont se fa coneisser dins lo mitan literari parisenc e al delà. Aprofiècha la casuda de la Pared de Berlin e la desrota de l'URSS per tornar veire sos parents aprèp vint ans d'abséncia. Dins lo decenni 90 lo trapam en Serbiá costat Radovan Karadzic ocupat a bombardar Sarajevo. Es forabandit sulpic dels mediàs occidentals. Lo tornam trobar a Moscòu vèrs 2000 ont a fondat lo Partit Nacional-Bolchevic (PNB) que la tòca es de contrar Potina. En 2002 es arrestat per causa de trafic d'armas en Kazakhstan dins l'amira d'un còp d'estat : purgarà dos ans de presons per aquò al luòc dels quatorze prevists en primièira lectura de mercé una campanha internacionala en sa favor. Tre genièr 2010 organiza lo 31 de cada mes una passa-carrièira amb lo moviment que co-baileja e sonat Strategia 31. Demandan lo respècte de la lei russa que autoriza las manifestacions. S'amassan gaireben un millierat de personas cada 31. Dempuèi que Limonov suggerís la resisténcia civila en plaça de la revolucion bolchevica que preconizava, inspira mai fisança al demai del mond e se plaça de fach en posicion d'opausant democratica de Potina.
Aquesta vida de rebaladís de longa s'es geminada amb un trabalh d'escritura de contunh en lenga russa, anglesa e percòps en francés. Son estile romanesc jamai luènh del jornal, del reportatge tanplan es sovent d'inspiracion autobiografica quitament se la misèra umana, sa negror e lo glas atraversa quasi tota son òbra.
Caquelà Limonov es un soldat, benlèu un mercenari, uèi, vièlh per se batre fisicament, persèc la luta en politica. Podèm entreveire çò qu'aquò representa en Russia apotinada. Caliá una missanta bèstia coma Limonov coneisseire dels bas-fons per aver lo coratge de se quilhar contra lo rei del Kremlin. Fa pensar a aqueles capdets de Gasconha venguts soldats per necessitat dins lo mitan baròc de las guèrras de religions del setzen sègle e que la batèsta èra venguda una fin al luòc del mejan de subrevida de la debuta.
Limonov seduís en cò nòstre perque es fòra nòrmas, fòra e al dessús de las societats, sentís a podra. Lo combat es sa vida coma sa vida es un combat. Liure a el de pensar qu'es merdosa.

NB : Emanuel Carrère edita en 2011 en cò de P.O.L :  Limonov, una biografia de 487 paginas de l'escriveire e que trapa la capitada en librariá (20€).

Soulcraft

ps : agacha defòra (e endacòm mai)
   

França e nucleari

L'istòria nucleara francesa comença d'efièch en 1948 amb un pichon nom : Zoe. Es lo nom feminin de la primièira pila atomica de combustibla d'oxida d'uranium natural moderat amb d'aiga pesuga. Fornís a pro pena qualques quilowatts mas l'essencial es aquí : produccion de radioelements per la recerca fondamentala que seguirà.

Aquesta pila es la primièra resulta tocabla del comissariat a l'energia atomica, CEA, creat pel General de Gàllia en octòbre de 1945. D'unes dison que foguèt impressionat per la poténcia desgajada dins las espetadas de Nagasaki e Hiroshima d'agost de la quita annada. Pensava dotar França a l'encòp de mejans de produccion electrica d'escala granda e de matièras fissiblas per l'arma atomica, aplech d'indenpendéncia, alara que las doctrinas Truman e Jdanov venentas pausan lo quadre teoric de la guèrra freja . Tanplan dins aqueste periòde de rebastison d'aprèp-guèrra se compren l'urgéncia e necessitat de tornar metre de pè l'industria e per aquò trobar l'energia movedissa d'aquela.
Fins a 1970 sièis reactors produison cinc del cent del consum total. Puèi, en octòbre de 1973 la guèrra del Kippour entre Israël e Egipta al sud e Israël e Siria al nòrd faguèt doblar lo prètz del barril de petròli pels países de l'OPEP. França, que cremava fòrça petròli fins ara per produisir electricitat, passèt a l'estadí industrial de sa politica nucleara per tal de parar al truc petrolièr. Dins l'encastre de la planificacion (6°plan) lo pargue nuclear francés es enauçat de 55 novèls reactors de 900 MW cadun entrò la fin de 1980.
D'ara enlà lo país s'autosufís energiticament. Aquel creissement espectacular amortís los efièches del truc petrolièr mas augmenta lo risc d'auvaris degut al nombre de caudièiras nuclearas : es indefugibla.
La seguretat de las centralas francesas es questionada lo 17 d'octòbre de 1969 a St Laurens ont un còr de reactor comença de fondre : eveniment classat nivèl 4 de l'escala INES* que n'en compta sèt.
Seguís Saclay en 1979, St Laurens en 1980, Bugey en 1984, La Hague en 1986, Tricastin en1987, Blayais en 1999, dins la Manche en 2002, Cattenom en 2005 ....
Sonca en França e la tièra es pas cap exaustiva.
Anam pas dintrar dins la polemica entre incidents o accidents ni dins la terminologia tecnica o oficiala. Lo nòstre punt de vista es subretot ciutadan. 
Es a dire que volèm pausar de questions e comprene, coma dins lo foncionament normal d'una democracia. Lo temps dels chècs en blanc a EDF es acabat : Tchernobyl es passat per aquí.
Nos pausarem de questions de fons, de causida "societala" lo còp que ven.


*International Nuclear Event Scale
*Escala Internacionala dels Eveniments Nuclears

Soulcraft

ps : agacha defòra !

Nucleari e democracia

Fa un an ja qu'un tsunami, consequéncia quasi mecanica d'un seïsme de magnitud 9 en plen ocean Pacific,  venguèt escrancar la còsta èst japanesa. Una onda d'una quizenada de mètres envasiguèt lo litoral, emportèt los ostals sovent de fusta, neguèt centenats,tuèt milierats de mond. Se parla de mai de vint mila mòrts o despareguts.

Tanplan l'òrre dels imatges viscut en dirèct suls ecrans de Tv  fissèt lo mond entièr.

Èra a Fukushima qu'es una vila (300000 estatjants) qu'auriá pogut s'en tirar se i aviá agut pas "qu'aquò" de pansar.

Levat que dins lo parcan de Fukushima (mai de dos milions d"estatjants) se trapa lo Centre nuclear de produccion d'electricitat de Fukushima Daiichi. L'ondassa degalhèt, en mai de çò que vesiam pus naut, lo capelet de reactors nuclears a broa d'ocean. L'aiga fèra sautèt la pared granda prevista per parar d'ondas de quasi 6 mètres de naut, aquesta d'aquí se quilhava a 15 mètres en mejana e fins a 30 mètres a d'endreches, e inondèt la structura nucleara fasent desfautar los sistèmas de refregiment dels reactors. Los dispositius de secors pensats per foncionar amb de grops electrogèns poguèron pas compensar, que l'aiga en arribar aviá desrabats las tinas de fiol necitas als motors dels grops.

La seguida es coneguda de totes : temperatura al dintre dels reactors fòrça nauçièra e fusion, o quasi, dels còrs 1, 2 e 3 amb escampatge dins atmosfèr de matièras nautament radioactivas.
A l'ora d'ara, es pas de bon evaluar las consequéncias de longs tèrmis sus la santat umana, animala o vegetala del quite Japon e sus la de la planeta. Perdeque lo malastre demòra pas dins las confinhas japanesas, lo nivolum radioactiu s'espandís d'en pertot suls continents e lo tractament del problèma e las responsas menadas vengon al nivèl planetar. Se pòt veire de totes sus la tèla l'aire d'espandiment del nivolas de matièra dins la nauta atmosfèr que atraversa Pacific, la màger part del jos-continent nòrdamerican e se dispersa sus gaireben tot l'emisfèr nòrd.
A un auvari dins l'encastre d'un territòri nacional se pòt, se dèu trobar solucions al nivèl mondial. Las nacions democraticas an pas totas lo meteis angle de percepcion pertocant lo biais, e l'eime, d'installar una produccion d'electricitat d'aprèp lo nucleari.
Dins un pòst seguent tentarem d'esclarcir lo politica de França sus aquel sicut.


Soulcraft

ps : agacha la nívol defòra        

Lo Sègle ( 2 )

Tornam uèi sul cercle de soscadissa parisenc : lo Sègle.

Sabèm de nòstra darrièira recèrca la tòca e lo mòde de recrutament del Sègle demest la casta decidaira d'aquel país.

An una amira essenciala qu'es, coma marcat dins "Lo Manifèst" vesible sul siti dedicat al cercle www.lesiecle.asso.fr, d'organizar e favorizar los escambís entre politics, foncionaris e sector privat. Amira essenciala, saique, pas sola ni unenca, segur.

Concretament los convidats s'amassan pel sopar que comença per un aperitiu, de pè, onte las personas presentas endralhan de convèrsas mai o mens orientadas e, o podèm extrapolar, per afinitat. Lo plan de taula es conegut just abans de s'ataular, çò que copa la possibilitat d'alestir d'elements de retorica adaptats a l'auditòri de la serada. Amai es previst de mesclar las personalitats que parlan jos lo contraròtle de liura paraula d'un president de taula e jos lo sagèl de la confidença que permet una libertat granda d'esperit e de tonalitat.

Doncas gaire d'indicas sul contengut dels debats que "susan" pas jamai. Levat per las mirgas.

Levat atanben quora de sòcis tòrnan lo davantal.Tal un ancian de Libération e director actual del Nouvel Observateur , Laurent Joffrin que claquèt la pòrta del Sègle en 2011. Expliquèt que lo corpus d'idèas que son a bailejar al cercle es lo liberalism mondialisat. Per el, es la doctrina economica d'una iper-classa eissuda de la mondializacion. Serián una mena de superclassa de bailejaires convencuts de modernism economic, conformism cultural e subretot del respècte absolut de la poténcia de l'argent. Pr'aquò, se trapan aquí dedins d'oligarcas de drecha coma d'esquerra. Semblariá que l'influéncia màger dins aquel cercle siá la dels financièrs del liberalism regde e desmaterializat.

Ara la rompedura se fa pas mai entre drecha e esquerra puèi que la pensada unenca es encloscada dins los partits de "poders" en França. Se fa puslèu entre mondialistas e antimondialistas e sustot dins lo contengut de la mondializacion e lo biais d'i procedir. Lo principi de mondializacion es gaireben acceptat d'en pertot e los opausants se vòlon mai altermondialistas que non pas antimondialistas.

Venèm de veire la quasi uniformitat ideologica del cercle. Alara se cadun pensa parièr, ont se trapa l'intères de n'èsser ?

Benlèu qu'una de las tòcas mai prigondas del club se tròba dins la consequéncia o dins un efièch del rencontre d'aquel mond.

Espepissarem aqueles lo còp que ven.

Soulcraft

Ps : agacha defòra!

 

SHK PNK

GOZ

Abreviacion de SHAKA  PONK
De qu'es aquò ?

Shaka Ponk es lo nom d'una formacion de musicians sortits de Nòrd de França en 2000. La referéncia paísa s'acaba aquí. Per çò que la còla es d'eime universal e li agrada pas de s'embarrar dins un encastre que siá fisic o esperitual. Emplegan d'elements de corrents fòrça diférents que venon de rock experimental, funk, hip-hop o del quite punk. Un de lor traches mai singular es de mesclar dins las paraulas de las cançons, lengas coma esperanto, anglés, espanhòl e percòps francés.
Aquel grop musical es format de sèt sòcis, sièis umans e un virtual. En cima 2003 debuta 2004, Frah, webmèstre e CC, guitarista encontran un pirata informatic a Los Angeles que lor balhan un ésser electronic de sa concepcion : Goz. Aqueste vendrà lèu la mascota e lo tresen sòci de la banda. Es un monin a l'encòp manèfla e mandrejaire que sembla lo rebat o l'eime del grop. Treva lo sistèma informatic dels ordinadors de la còla e participa a cada prestacion scenica pel biais de sa projeccion visuala sus l'empont. A aquesta escasença se pòt remarcar l'aspècte espectral de sa preséncia ; es una trèva coma son nom o ditz : Goz es la reduccion de ghost en anglés.
Maites umans venon s'acolar : Mandris per la bassa, Steve al clavièr e sample e Ion a la battària. I a dos cantaires : Frah qu'es dins lo nogal primarenc e Sam, darrièra venguda.
Lo fach de cantar dins una lenga autra que lo francés ajuda pas a traucar e la formacion dèu mudar a Berlin per trapar un productor de las idèas largas. Dins la capitala germana asseguran las primièiras partidas de grops tals Korns, Exilia, Skin o Hoss Boss.Se fan remarcar d'un manager que lor tròba datas de concèrts e lor met a posita un bunker per las repetas.
En 2006 se fan coneisser del mitan francés amb Loco con da frenchy talking, lo primièr album. 2009 es l'annada del segond album : Bad porn movie trax que estampa lo son Shaka dins las aurelhas. En 2010 son nomenats a las Victorias de la musica coma revelacion scèna de l'annada mas ganhan pas. Lo tresen album, The geeks and the jerkin'Socks sortís en junh de 2011 : es una meravilha d'energia.
Lo pus agradiu dins aqueste grop es benlèu lor biais mondialista(comprene alter-) d'enfaciar las causas es a dire que mesclan las infuéncias, las idèas, gaireben las filosofias entre elas.
Per pròva lo nom del grop : Shaka es lo primièr nom de Bodha e Ponk es la referéncia punk de la còla. 
Ara, ieu lo matin, quora soi un pauc gres, preni un rasal de Shaka per tornar prene vam.


Agachatz d'espervautres : Let's bang o My name is stain sus los sitis Youtube o Dailymotion!!!


Soulcraft