Lo Sègle ( 1 )

Think Tank

Coneissètz lo Sègle ?

Non pas lo vint-e-un, nimai lo vint, mas vòli dire los sopars del Sègle que, çò dison, se debanan cada mes a Paris, Plaça de la Concòrda dins l'Ostal de l'Automobil Club de França. E aquò dètz meses l'an.

Lo sègle es un cercle de reflexion declarat jos la forma d'una associacion de Lei de 1901. Es una mena de think tank a la francesa. Creat en setembre de 1944, se vòl un luòc de sociabilitat dels eleits de França entre eles. Per de que los critèris essencials del recrutar son los poders vertadièrs estacats al pòste o a la posicion dels candidats. Atal trobam d'òmes politics, jornalists de premsa escricha e audiovisuala, universitaris, nauts-foncionaris, editors, plan segur capitanis d'entrepresas e menaires d'ostals financièrs privats, tanben caps d'entrepresas publicas e inspectors generals de las finanças, qualques artistas e pauc de sindicalistas siquenon del Medef o d'aquela dralha.
De per la situacion d'aqueles òmes e femnas dins la ieràrquia sociala, lo Sègle es tanben e benlèu mai que mai un cercle d'influència tanpauc que de soscadissa. 

L'adesion al cercle es possibla per la presentacion del candidat per un parelh de pairins ja sòci. S'en seguís un periòd d'observança de mentre loqual lo novelari dèu se conformar a las règlas e a l'esperit del grop. Se capita, aurà l'estatut de convidat sens longor de temps limitada fins a çò que siá adobat e venga sòci entièr. Plan entendut, demorarà sòci de plen drech tant qu'aurà lo pes, per pas dire lo poder,  dins la societat per qual èra  estat causit. Es procedat a un vòte d'un biais fòrça original e estrangièr del tot a la democràcia que coneissèm en Euròpa. Utilizan un sistèma de bolas negras e blancas. Per dintrar cal amassar una majoritat minimala dins una proporcion de doas blancas per una negra (siá 67%). Una bola negra val donc doas bolas blancas. E se avètz tres bolas negras, siatz refusar automatic, per tal de pas crear de tensons dins lo grop.
Podèm d'ara enlà se trachar del prautiment suau d'un principi màger de democràcia : un òme = una votz. Aquesta practica de nomenacion èra estada vista ja dins las lòjas maçonicas.
Vaquí pel decòr e lo recrutar. Dins un autre pòst arribarem la pensada e l'environament ideologic d'aquel cercle mai que discret.

Soulcraft 
ps : agacha defòra!

Decas, fautas, mancanças, pecats e ....nèu

Neva. Davala del cèl lo mantèl. Ven del denaut lo davantal. Cobrís lo campèstre, las rotas, los ostales e totas las causas umanas o d'abans aquestas. Los enfants s'amusan e tota aquela candor apasima las umors extrèmas. Tala una parentèsi que atuda los bruches e tanben aclatariá las tensons. Una estona entre doas virgulas ; la nèu estofa los pensaments e tua los laguis. Per un moment l'anar del mond s'alentís, semblariá que totes los problèmas dintrèsson dins lo sòl, dejós la tèrra.

Quina pecaira de raça acesta umanitat!

Se confla de sa siá-disenta sciéncia e es tant òrba que vei quitament pas l'autre mond. Pr'aquò es a posita per lo qu'o sap veire.

Mas l'autra raça es aquí que viu dins lo país jos la tèrra.

Es a l'espera del moment de sortir, que aquesta mena de creaturas se noirís de las decas dels òmes. Se congostan dels pecats e autras mancanças que, justament, mancan pas a los de defòra.Que aquesta noiridura immateriala tant provesida en cò dels òmes es una golardisa per las bèstias del negre mond. Se creson soletats dins l'univèrs alara que los que cal pas dire lo nom sabon. Coneisson la qualitat amagada de la nèu luminosa que embeu los pecats umans per melhor los assadolar. Sabon que la nèu foguèt donada a la tèrra per l'asanir de l'activitat umana tala un acaptador que fa dintrar las fautas d'aquela dins, o puslèu, jos la tèrra, çò que balha pitança al daquòs del dintre.S'avidan, se gavan d'aquesta marrida matièra espirituala e esperan lo punt de cabussa onte, pron fòrts, poiràn morrejar al defòra e se regalar de carn forenca. 

Pr'amor, cada cicle, nautre o autre, s'acaba.

Es vengut lo temps dels comptes.Pica lo senhal qu'esperavan. Aqueste an novèl mena una barròcaria, un eveniment de los rarissims : una annada de las tretze lunas. Se los òmes avián servat fisança en lo mond de la mascariá que eles sabián, benlèu alara s'auriá pogut alestir un govèrn de sàvia conducha per tal de pas tant apasturar los mostres.

Caquelà sabèm que, dins natura, cap de causas se pèrd pas jamai mas se trasforma ; pensadas coma fusta, un còp poirida, engraissan lo sòl.

Nècis, o avèm doblidats.

Non pas los de jos la tèrra.

Damatge.

Soulcraft

PS : Agacha defòra ! ...e decòps dejós !